DSWD nagbigay ng ayuda sa pamilya ng 5 rescuers ng Bulacan
MANILA, Philippines — Bilang pagpugay sa kabayanihang ginawa ay nagbigay ng tulong pinansyal ang Ayala Foundation katuwang ang Department of Social Welfare and Development (DSWD) sa mga pamilya ng limang rescuers ng Bulacan Provincial Disaster Risk Reduction Management Office, na nagbuwis ng buhay habang nagsasagawa ng rescue mission sa pananalasa ng Super Typhoon Karding sa San Miguel, Bulacan.
Sa isang maigsing programa, nagbigay-pugay sina Secretary Erwin Tulfo, Ayala Foundation Inc. President Ruel Maranan at Ayala Corporation Managing Director General Emmanuel Bautista (Ret.) sa mga namayapang rescuers na sina George Agustin, 45; Troy Justin Agustin, 30; Marby Bartolome, 37; Narciso Calayag Jr., 33; at Jerson Resurreccion, 33 at bilang pagkilala sa kanilang mga kabayanihan.
Pinangunahan ni Sec. Tulfo ang turnover ng check donation ng Ayala Foundation sa pamamagitan ni Maranan sa DSWD Central Office sa Quezon City kahapon ng umaga.
“Nagbibigay-pugay po kami sa inyong mga kapamilya sa kanilang ginawang pagbubuwis ng kanilang buhay sa pagtulong sa kanilang mga kapwa…” Ang kanilang kabayanihan ang nagbibigay-buhay at inspirasyon upang patuloy na makatulong sa marami pang nangangailangan,” pahayag ni Maranan.
Ang#BrigadangAyala ng Ayala Group of Companies ay maagap na nagsagawa ng relief operations sa iba’t ibang bahagi ng Luzon matapos humagupit ang super typhoon Karding.
“We’d like to thank Ayala Foundation for always being there in times of crisis. Ang Ayala Foundation po ay nariyan at ka-partner po ng pamahalaan sa pagtulong sa tuwing mayroong sakuna at crisis ang ating bayan,” pahayag pa ni Tulfo.
- Latest
