Undas posibleng maging COVID-19 super spreader
MANILA, Philippines — Posibleng maging COVID-19 ‘super spreader event’ ang pagpunta ng publiko sa mga sementeryo sa darating na Undas.
Ito ang paalala ni Department of Health (DOH) officer-in-charge Maria Rosario Vergeire, hindi kinakategorya ang Undas na “low risk setting” dahil sa inaasahan na taun-taong dinadagsa ng napakaraming tao ang bawat sementeryo.
Payo ni Vergeire ang mahigpit na pagsusuot pa rin ng face mask ng bawat isa kahit na niluwagan na ang pagsusuot nito sa mga ‘outdoors’, bilang pamproteksyon sa sarili at maging sa mga uuwian na mga kaanak.
Nagpaalala rin ang opisyal na dapat nakapagpaturok na kahit ng unang dose ng booster shot bago magtungo sa puntod ng mga minamahal para may dagdag na proteksyon laban sa virus.
Ipinaalala rin niya na sa ngayon ay nakikitaan ang bansa ng bahagya ngunit patuloy na pagtaas ng mga kaso ng COVID-19, kaya malinaw na masasabi na nananatili ang banta ng COVID-19 sa lahat.
Naniniwala si Vergeire na alam na ng mga Pilipino ang kanilang gagawin para makaiwas na mahawa sa virus dahil sa ito na ang ikatlong Undas na nasa pandemya ang bansa.
- Latest