Kuya dinedbol ng utol sa harap ng anak
MANILA, Philippines — Namatay noon din ang 39-anyos na lalaki matapos pagbabarilin ng nakababatang kapatid habang naglalakad pauwi sa kanyang bahay sa Sitio Labrahan, Barangay Don Juan Vercelos, San Francisco, Quezon, kamakalawa.
Kinilala ang nasawing biktima na si Michael Yare, habang tugis na ng pulisya ang suspek na kapatid nito na si Melencio Yare, 37, binata ng Sitio Awas, Barangay Casay.
Ayon sa pulisya, alas-8:00 ng gabi ay naglalakad patungo sa kanyang bahay ang biktima kasama ang anak na si John Paul nang harangin sa daan ng suspek.
Bumunot ng baril ang suspek at walang sabi-sabing pinaulanan ng punglo ang nakatatandang kapatid sa harap ng anak nito.
Nang matiyak na patay na ang kanyang kuya ay mabilis na tumakas ang suspek at iniwang umiiyak ang pamangkin.
Inaalam pa ng pulisya ang motibo ng pamamaslang ng suspek sa kanyang kapatid na kinasuhan ng murder. - Ed Amoroso
- Latest