Bebot inaresto sa bagahe na may lamang P7.8 milyong shabu
MANILA, Philippines — Inaresto ng mga otoridad ang isang dalaga na tumanggap ng isang package na galing London matapos matuklasan na naglalaman ito ng P 7.8 milyong halaga ng shabu, kamakalawa ng hapon sa Barangay Queensrow Central, Bacoor City, Cavite.
Kinilala ang suspek na si Noelle Denise Azul, dalaga, 29, residente ng Blk 11, Lot 23, Magdiwang Subdivision ng nasabing barangay habang wala sa nasabing bahay ang mismong recipient o nakapangalan sa package na si Octavia Dela Cruz, 30.
Batay sa ulat, dumating ang package sa Bureau of Customs Port of Clark nitong Setyembre 23 kung saan idineklara na naglalaman ito ng mga stuff toys.
Nang idaan ito sa x-ray inspection at K9 sniffing dogs ay nakitaan na may kahina-hinalang laman at isinailalim sa physical examination sa pamamagitan ng Rigaku Progency ResQ FLX Chemical Analyzer ang nasabing bagahe at dito nakumpirma na droga ang laman nito.
Agad na bumuo ng operasyon ang mga otoridad at sinundan ang address ng nasabing package na dumating alas-5:00 ng hapon sa nasabing bahay sa Bacoor City, Cavite. Nang tanggapin ni Azul ang package ay agad itong inaresto at nang siyasatin sa harap nito ang laman ng bagahe ay tumambad ang bultu-bultong shabu na kasama ng ilang piraso ng stuff toys at nakasiksik ang tatlong asul na plastic bags na naglalaman ng may mahigit sa 1,140 gramo ng shabu at aabot sa halagang P7,866,000.00 milyong piso. - Ed Amoroso, Danilo Garcia
- Latest
