5 rescuers sa Bulacan patay kay ‘Karding’
MANILA, Philippines — Limang lalaki na pawang mga kawani ng Bulacan Provincial Disaster Risk Reduction and Management Office (BPDRRMO) ang natagpuang patay kahapon ng umaga sa Sitio Galas, Brgy. Camias ng nasabing bayan.
Kinilala ni PDRRMO Chief Liz Mungcal ang mga nasawi na sina George Agustin; Troy Justin Agustin; Marby Bartolome; Narciso Calayag at Jerson Resurreccion, pawang nasa hustong gulang.
Batay sa report, alas-7:00 ng umga nang madiskubre sa magkakahiwalay na lugar ang wala ng buhay na mga rescuers sa Sitio Banga-Banga, Brgy. Camias ng nasabing bayan.
Ayon kay Bulacan Governor Daniel Fernando, magdadala sana ng tulong sa mga naapektuhang pamilya sa Obando Evacuation area ang mga biktima nang masiraan at tumirik ang truck na kanilang sinasakyan.
Kaya’t nagpasya ang lima na sumakay na lamang ng life boats nang biglang rumagasa ang flash floods sa kanilang kinaroroonan na nagpaguho ng isang pader na siyang naging dahilan ng pagdaloy ng malakas na tubig-baha na umanod sa kanila at nalunod.
Sinabi ng Gobernador na magbibigay siya ng personal na tulong sa pamilya ng mga biktima bukod pa sa tulong na manggagaling sa Pamahalaang Panlalawigan ng Bulacan.
Idinagdag pa ng Punong Ehekutibo na matatanggap ng mga biktima ang lahat ng mga benepisyo na nakalaan para sa kanila bilang empleyado ng Kapitolyo na ngayon ay kinikilala niya bilang mga bayani ng Bulacan.
Dumagsa naman ang pakikidalamhati ng publiko sa ipinakitang kabayanihan ng mga biktima na hindi inalintana ang panganib masagip lamang ang mga taong nasalanta ng bagsik ng super typhoon Karding. - Doris Franche
- Latest
