DILG memo vs Traffic enforcers’ kinontra!
Pangungumpiska ng lisensya, tuloy sa Maynila
MANILA, Philippines — Sa kabila ng inilabas na memorandum ng Department of the Interior and Local Government (DILG) na nagbabawal sa mga traffic enforcers na manghuli ng mga lumalabag sa batas trapiko, kinontra ito ng lokal na pamahalaan ng Maynila at sinabing patuloy silang manghuhuli at mangungumpiska ng driver’s license sa ilalim ng umiiral nilang ordinansa.
Ayon kay Atty. Princess Abante, tagapagsalita ni Mayor Honey Lacuna, may awtoridad ang Maynila na mangumpiska ng mga driver’s license alinsunod umano sa kapangyarihan na ibinibigay sa mga lokal na pamahalaan ng Local Government Code.
“Ayon sa Local Government Code, malinaw na may kapangyarihan ang mga lokal na pamahalaan na bumalangkas ng mga batas patungkol sa pagsasaayos sa trapiko sa loob ng kanilang lungsod, kasama rito ang kapangyarihang manita, manghuli, at mag-confiscate ng lisensya,” ayon kay Abante.
Sa Memorandum na may petsang Setyembre 14, 2022 na pirmado ni DILG Secretary Benhur Abalos, ipinaalala niya sa mga lokal na pamahalaan na tanging mga tauhan ng Land Transportation Office (LTO) at mga “deputized agents” lamang nito ang maaaring mangumpiska ng lisensya.
“The LGUs can issue traffic citation tickets but only the LTO and their deputized agents can confiscate driver’s licenses,” nakasaad sa memo.
Sinabi ni Abante na iginagalang naman nila ang polisiya na inilabas ng DILG ngunit kailangan nilang ipatupad din ang kanilang lokal na batas trapiko na nasa ilalim ng Ordinance No. 8092 o ang Traffic Code of the City of Manila.
Makikipag-ugnayan naman umano si Mayor Lacuna kay Abalos upang bigyang-linaw ang isyu.
- Latest
