Pinas target umangkat ng 150,000 MT ng asukal
MANILA, Philippines — Kinumpirma kahapon ni Press Secretary Trixie Cruz-Angeles na pumayag si Pangulong Ferdinand Marcos Jr., na umangkat ng 150,000 metriko toneladang asukal.
Ayon kay Cruz-Angeles, naabot ang kasunduan sa pakikipagpulong ni Marcos Jr. kasama si Senate President Juan Miguel Zubiri at mga nasa industriya ng asukal sa Malacañang noong Miyerkules, Agosto 17, 2022.
Sinabi ni Cruz-Angeles na ang 150,000 MT ang panukalang dami ng asukal na aangkatin.
“Yun po ang proposed quantity for importation gawa ng pangangailangan ng mga industriyal na tinatawag ng ating Pangulo,” sabi ni Cruz-Angeles.
Ayon pa kay Cruz-Angeles, ang mismong malalaking negosyo na gumagamit ng asukal sa kanilang produkto ang nakausap ng Pangulo.
Pero wala pa aniyang itinakdang araw o buwan kung kailan aangkatin ang 150,000 MT ng asukal.
Matatandaan na sa lingguhang vlog na na-upload noong Linggo, sinabi ni Marcos na maaaring mag-import ng asukal ang pamahalaan ng hanggang 150,000 metriko tonelada na kalahati ng naunang mungkahi ng Sugar Regulatory Administration (SRA) na maaaring gawin sa Oktubre.
- Latest
