Resolusyon sa pag-angkat ng 300K MT asukal, ilegal -- Malacañang
MANILA, Philippines — Inihayag ng Malacañang na ilegal ang resolusyon na naglalayong mag-import ng 300,000 metriko tonelada ng asukal na nilagdaan sa ngalan ni Pangulong Ferdinand Marcos, Jr. dahil hindi nagpatawag ng anumang pagpupulong ang pinuno sa Sugar Regulatory Administration (SRA).
Ito ang sinabi ni Press Secretary Trixie Cruz-Angeles na nilagdaan ni Agriculture Undersecretary Leocadio Sebastian ang resolusyon sa ngalan ng Pangulo, na nakaupo rin bilang kalihim ng agrikultura, ngunit hindi pinahintulutan na gawin ito.
Nilinaw ni Angeles na hindi pinahihintulutan ng Pangulo ang pag-import ng asukal.
“Yesterday a resolution was uploaded on the website of the SRA purportedly coming from the Sugar Regulatory Board Resolution No. 4 autho-rized the importation of 300,000 MT of sugar on top of what had already been imported in May of this year. This resolution is illegal,” ani Cruz-Angeles.
Sinabi pa ni Cruz Angeles na sensitibong bagay ang importasyon lalo na ang mga produktong pang agrikultura kaya kailangan itong balansehin.
Nilinaw naman ni Cruz-Angeles na ang resolusyon ay plano pa lamang para sa pagsasagawa ng importasyon.
Nagpapatuloy aniya ang imbestigasyon para matukoy kung may makikitang anumang aksyon na magiging sanhi ng pagkawala ng tiwala ng Pangulo sa kanyang mga opisyal, o kung may nangyaring “malice or negligence.”
- Latest