DOH nakapagtala ng higit 1K kaso ng leptospirosis
MANILA, Philippines — Nasa kabuuang 1,078 leptospirosis cases ang naitala sa bansa ng Department of Health (DOH) mula Enero hanggang Hulyo ng taong ito dahil sa pagdating ng panahon ng tag-ulan.
Ayon kay DOH Officer-In-Charge (OIC) Maria Rosario Vergeire, ang 165 sa naturang bilang ay naitala mula Hunyo 26 hanggang Hulyo 23 lamang na ang pinakamaraming naitalang kaso sa panahong ito ay sa National Capital Region (NCR), Cagayan Valley at Central Luzon.
Umabot naman na sa 156 ang nasawi dahil sa leptospirosis mula noong Enero hanggang Hulyo.
Muling nagpaalala si Vergeire sa publiko na umiwas sa paglusong sa baha upang hindi dapuan ng leptospirosis. Pero kung talagang hindi maiwasan, maaaring gumamit ng mga protective gears, gaya ng bota.
Kung lumusong naman sa baha at may sugat sa paa, agad magpakonsulta sa barangay health center para makakuha ng prophylaxis.
Kabilang sa sintomas ng leptospirosis ay lagnat, masakit na kasu-kasuan at pananakit ng tiyan.
- Latest