Pulis-Batangas, todas sa ambush
MANILA, Philippines — Idineklarang dead-on-arrival sa ospital ang isang 52-anyos na police official matapos pagbabarilin habang sakay ng kanyang van ng riding-in-tandem suspects sa naganap na ambush, kamakalawa sa San Juan, Batangas.
Ang nasawing biktima ay kinilalang si Police Executive Master Sergeant Romel Panopio, residente ng Barangay Tipaz, San Juan, Batangas at nakadestino sa Batangas Police Provincial Office (BPPO).
Ayon sa ulat, alas-3:40 ng hapon ay minamaneho ni Panopio ang kanyang van at papasok sa kanyang trabaho at pagsapit sa Brgy. Calicanto ay sumulpot ang isang motorsiklo lulan ang dalawang suspek at agad na siya ay pinagbabaril.
Nawalan ng kontrol sa manibela ang biktima at sumalpok sa poste ng isang gusali habang ang mga suspek ay mabilis na tumakas.
Naisugod pa sa pagamutan si Panopio, subalit idineklarang dead on arrival dahil sa mga tama ng bala sa katawan. - Ed Amoroso, Arnell Ozaeta
- Latest
