Marcos sa mga mag-aaral: Magpa-booster bago mag-F2F classes
MANILA, Philippines — Bago magsimula ang face-to-face classes sa huling linggo ng buwang ito ay hinihimok ni Pangulong Ferdinand “Bongbong” Marcos Jr. ang mga mag-aaral na magpaturok ng kanilang COVID-19 booster shot. “Una na riyan ‘yung panigurong nakapag-booster shot na ang lahat lalo na ang ating mga kabataan para siguradong handa ang pangangatawan nila sa pagbabalik eskuwela,” aniya sa kanyang weekly vlog.
Ibinahagi niya na nasa 15.9 milyong Pilipino ang nakatanggap na ng COVID-19 booster shot, habang 1.2 milyon pa ang naka-avail na ng pangalawang booster dose.
“Hindi pa ito magandang numero kumpara sa target natin na 100 percent kaya hindi tayo magsasawa na pakiusapan ang ating mga LGU na magiging mas agresibo dito sa kampaniyang ito,” wika nito.
Pinaalalahanan din ni Marcos Jr. ang mga public transportation sector na tiyaking masusunod ang pinakamababang protocol sa kalusugan at kaligtasan.
Ipinunto niya na kung matagumpay ang pagpapatupad ng mga in-person class, maaari rin itong magresulta sa isang mas matatag na ekonomiya.
- Latest