Away-pulitika sa Ilocos Sur, sumiklab Aides ng magkalabang mayor nagbarilan: 4 todas!

MANILA, Philippines — Patay ang apat na aides o supporters ng magkalabang mayoral bets matapos ang pag-atake na humantong sa gun battle sa kasagsagan ng kanilang pangangampanya kahapon ng umaga sa Sitio Danglas, Barangay Labut, Magsi­ngal, Ilocos Sur.

Dalawa sa mga napatay ay kinilala ng pulisya na sina Lerryphol Torda at Bagani Recto habang ­inaalam pa pagkakakilanlan ng dalawa pang nasawi.

Sa ulat, dalawa sa kanila ay agad na nasawi sa insidente habang ang iba ay nalagutan ng hininga sa ospital.

Sa inisyal na imbestigasyon na bigla umanong inatake ng armadong grupo ng isang kandidato ang mga bahay ng mga aides ng isa pang kandidato dahil sa sinasabing isyu ng vote buying na humantong sa barilan.

Maraming nagkalat na basyo ng bala ng M16 assault rifle ang narekober ng mga awtoridad malapit sa van at motorsiklo na ginamit ng mga sangkot sa shootout.

Nabatid na ang sangkot sa matinding “political rivalry” sa bayan ng Magsingal ay ang nagbabalik na mayor na si Alrico Favis ng Kilusang Bagong Lipunan (KBL) laban sa independent candidate na si Lorry Salvador Jr. - Joy Cantos