‘Misteryosong pasahero’ sa PUVs ipapakalat ng DOTr
Para matiyak na sumusunod sa ‘no vax, no ride’ policy…
MANILA, Philippines — Para makatiyak na sumusunod ang mga driver at operator sa “no vax, no ride” policy ay magpapakalat ang Department of Transportation (DOTr) ng mga “mystery passenger” sa loob ng pampublikong sasakyan.
Ito ang sinabi ni Assistant Secretary for Road Transport and Infrastructure Mark Steven Pastor na isa umanong paraan na makakatitiyak ang DOTr na kahit walang nanghuhuling law enforcer ay maipapatupad ang polisiya dahil parang mga normal na pasahero lang na nagbabayad din ng pasahe ang mga “mystery passenger” na magsisimula sa Lunes (Enero 17).
Bukod dito ay nagbabala rin ang DOTr ang mga nagbabalak gumamit ng pekeng vaccination card sa mga pampublikong sasakyan sa bansa lalo na sa Metro Manila.
Sinabi ni Undersecretary for Legal Affairs Reinier Paul Yebra na may parusang kulong at multa ang mga mahuhuling namemeke ng vaccination card sa ilalim ng revised penal code.
Bukod dito ay mayroon din anyang kaparusahang nakapaloob sa mga ordinansa na ipinasa ng mga local gov’t units (LGUs) na naglilimita sa paglabas sa bahay ng mga unvaccinated individuals na kung saan ay parurusahan ang mga pasaway batay sa ilalim ng Republic Act 113322.
Makakatuwang ng DOTr ang Land Transportation Office, LTFRB, I-ACT, MMDA, mga LGUs at ng PNP sa pagpapatupad ng “no vax, no ride policy”.
- Latest