PGH COVID-19 ward, lumuwag na
MANILA, Philippines — Dahil sa patuloy na pagbaba ng bilang ng mga pasyenteng may COVID-19 na nakaratay ay nakakahinga na ngayon ang mga medical health workers ng Philippine General Hospital (PGH).
Sinabi ni PGH spokesperson Dr. Jonas del Rosario na 237 na lamang ang okupado sa kanilang 325 COVID-19 beds mula sa 355 pasyente na naitala noong mga nakalipas na linggo na dahilan ng pagpapahinto sa pagtanggap ng mga pasyenteng may COVID-19.
Sa kabila naman nito, sinabi ni Del Rosario na marami pa rin silang pasyente ngayon na malala at kritikal ang kalagayan dahil sa COVID-19 kaya’t puno pa rin ang kanilang intensive care units (ICU).
Palagi pa rin naman silang nakakatanggap ng mga walk-in patients sa kanilang emergency room (ER) ngunit mas umikli na ang panahon na ipaghihintay ng mga pasyente ng COVID-19 para mailipat sila mula sa ER patungo sa ward, na inaabot na lamang ng isa o dalawang araw.
Bagama’t mas nakakahinga na ngayon, hindi pa rin umano makapagrelaks ang kanilang mga healthcare workers dahil sa kailangang maibaba muna sa 200 pasyente ang laman ng kanilang COVID center.
- Latest
