Extension ng ECQ sa NCR ‘fake news’! – MMDA
MANILA, Philippines — Pinabulaan ng Metropolitan Manila Development Authority (MMDA) ang kumakalat na ulat na nagsasabing nagkasundo ang Metro Manila mayors na palawigin pa ang enhanced community quarantine (ECQ) sa National Capital Region (NCR) hanggang Agosto 30, 2021, sa gitna ng patuloy na banta ng COVID-19 Delta variant.
“The Metropolitan Manila Development Authority denies a news report quoting Parañaque City Mayor Edwin Olivarez that all the metro mayors have agreed to extend the enhanced community quarantine (ECQ) until August 30,” ayon sa pahayag ng MMDA.
Sinabi ni MMDA Chairman Benhur Abalos na nakausap niya si Mayor Olivarez at nagsabi na walang naganap na pagpupulong ng Metro Manila Council (MMC) at walang katotohanan ang lumabas na artikulo.
Nakatuon umano ang mga alkade ngayon sa monitoring sa bilang ng mga kaso ng COVID-19 sa kanilang mga hurisdiksiyon, sa vaccination rollout, at pamamahagi ng ayuda sa mga pamilyang lubhang apektado ng
ECQ.
Ani Abalos, anumang rekomendasyong mabubuo ng MMC ay ibabatay sa mga datos, kakayahan ng lokal na pamahalaan at mga eksperto sa health at economic.
Sinabi naman ni Health Usec. Maria Rosario Vergeire na wala pang basehan para desisyunan kung dapat i-extend ang pinakamahigpit na lockdown o ECQ.
- Latest
