60-day price freeze sa essential goods ipatupad
MANILA, Philippines — Para maiwasan ang pagtaas ng presyo ng mga bilihin kabilang na ang oxygen tanks ay iminungkahi ni Senator Imee Marcos na magpatupad muli ang gobyerno ng 60-day price freeze ngayong araw sa pagsisimula ng enhanced community quarantine (ECQ).
Hiniling din ni Marcos sa Department of Trade and Industry (DTI) at Philippine National Police (PNP) na bantayan ang mga palengke, supermarkets at mga supplier ng medical equipment sa National Capital Region (NCR) plus at iba pang lugar na napapaulat na nagkakaroon ng panic buying at hoarding.
Dapat anya na i-monitor at kasuhan ng DTI at PNP ang mga consumers na sobra-sobrang bumili ng mga produkto para hindi maubusan ang ibang nangangailangan.
Partikular na tinukoy ng mambabatas ang ulat na nagkakaubusan na ng oxygen tanks at accessories nito sa Cebu City at Aklan dahil sa biglaang pagsipa ng kaso ng COVID-19.
Maaari anyang maharap sa mabigat na parusa ang sinumang hoarders at profiteers sa ilalim ng Consumer Act o Republic Act (RA) No. 7394 at Price Act o Republic Act 7581 na may katapat na multa at parusang pagkakakulong.
- Latest
