‘Brigada Eskwela’ kasado na sa Agosto 3
MANILA, Philippines — Nakatakda nang simulan ng Department of Education (DepEd) ang “Brigada Eskwela” para sa School Year 2021-2022 sa Agosto 3, Martes.
Ayon sa DepEd, ang magiging tema ng Brigada Eskwela ngayong taon ay ‘Bayanihan para sa Paaralan.’
“Ang Brigada Eskwela 2021 ay naglalayong pagtibayin ang pagbabayanihan ng Kagawaran ng Edukasyon at ng mga stakeholders para sa patuloy na paghahatid ng dekalidad na edukasyon sa kabila man ng pandemya ngayong darating na pasukan,” anang DepEd.
Inaanyayahan naman ng DepEd ang mga mamamayan na birtuwal na makilahok sa National Kick-Off Ceremony ng Brigada Eskwela na gaganapin sa Agosto 3, 2021 sa pangunguna ng SDO Tagum City ng DepEd Region 11, sa ganap na ika-2:00 ng hapon, sa pangununa ni DepEd Secretary Leonor Briones.
Inaasahang magkakaroon din ng sariling kick-off ceremony ang mga Regional Offices at Schools Division Offices sa kani-kanilang mga lugar.
Magtatagal ang Brigada Eskwela hanggang sa Setyembre 30, 2021.
- Latest