Hidilyn makakatanggap ng malaking halaga mula kay Duterte
MANILA, Philippines — Inihayag ni Presidential Spokesperson Harry Roque na makakatanggap ng malaking halaga na aabot sa milyun-milyong piso mula kay Pangulong Rodrigo Duterte si 2021 Tokyo Olympics gold medalist Hidilyn Diaz.
Ayon kay Roque, iuukit sa kasaysayan ng Pilipinas ang pangalan ni Hidilyn at nangako si Duterte na magbibigay ng milyun-milyong piso sa sinumang makakapagbigay ng gintong medalya sa Pilipinas.
Pero, tumanggi si Roque na tukuyin ang eksaktong halaga dahil posible pa aniya itong tumaas na karapat-dapat aniyang ibigay kay Hidilyn.
Sinabi rin ni Roque na kung ano man ang pagkukulang (sa suporta) noong magti-training pa si Hidilyn ay tiyak na mababawi dahil sa ibibigay ng pamahalaan at ng pribadong sektor.
Idinagdag ni Roque na hindi mababayaran ng salapi ang tagumpay ni Hidilyn at sasamahan ng gobyerno ng pabuya ang kanilang pagbati sa kauna-unahang Filipina na nag-uwi ng gintong medalya mula sa Olympics.
- Latest
