Duterte sa LGUs: ‘Wag papilahin sa bahang lugar ang mga magpapabakuna
MANILA, Philippines — “Gamitin” ang common sense at huwag paghintayin ang mga tao sa pila habang umuulan at may tubig-bahang lugar para lamang mabakunahan laban sa COVID-19.
Ito ang apela ni Pangulong Rodrigo Roa Duterte sa local government units (LGUs) matapos na makatanggap ng ulat na sa kabila ng malakas na buhos ng ulan at pagbaha ay nakapila pa rin ang mga tao sa vaccination sites sa Metro Manila, kabilang na ang Maynila at Mandaluyong maturukan lang ng bakuna laban sa covid-19 ngayong linggo.
Sinabi ng Pangulo sa kanyang ipinatawag na special meeting kasama ang Inter-Agency Task Force (IATF) sa Malacañang na kailangan na magpalabas ang LGUs ng mas matinong proseso ng pagbabakuna na papayagan ang mga tao na pumila “as early as 4 a.m.” at mabakunahan ng “9 a.m.”
“Cold people are exposed in the open, unprotected from the elements then they are waiting to get a chance to have the shot, mga 3 to 4 hours magtindig diyan. Sa bagay, baha ngayon diyan,” dagdag na pahayag ng Pangulo.
Kaya’t sinabihan ni Pangulong Duterte si Interior Secretary Eduardo Año na magpalabas ng direktiba na magbibigay kautusan sa LGUs na maging mas “proactive” at “circumspect especially now that the Southwest Monsoon is passing the country na. It’s not the way to do it.”
Sinabi ng Punong Ehekutibo na kailangan na maghanap ang mga alkalde at barangay kapitan ng tuyo at malaking lugar para magsagawa ng pagbabakuna at maayos na iorganisa ang iskedyul para sa pagbabakuna.
“Para bang to me, it’s bullsh*t kapag ganun ang ginagawa mo sa Filipino if you can’t do it in a place where there’s roof and cover their heads na hindi sila mabasa. Not exposed to elements. Umagang-umaga, [nakita ko], naku Dios ko po, bakit naman ganun,” dagdag na pahayag ng Pangulo.
Binalaan naman ni Pangulong Duterte ang mga LGU na huwag nang maulit pa ang nasabing insidente dahil kawawa ang mga tao sa sakit.
- Latest
