Bakuna na itinurok sa taga- Quezon City, higit 1.2 milyon na

MANILA, Philippines — Nasa 1,216,568 doses ng bakuna ang naiturok na sa mga residente at mga manggagawa sa Quezon City sa nagpapatuloy na Vaccination Program ng lokal na pamahalaan laban sa COVID-19.

Sa kabuuan, 739,911 o 43.52% ng 1.7 million na target population ang nabakunahan na ng first dose sa QC sa kabila ng limitadong suplay ng bakuna.

Umakyat naman sa 476,657 o 28.04% ang nakatanggap na ng second dose.

Ayon kay QC Mayor Joy Belmonte, malaking bagay ito lalo pa at may banta ng Delta Variant kaya’t hinikayat nito ang mga residente at mga manggagawa na nagtatrabaho sa lungsod na magparehistro na sa QC Vax Easy upang makatanggap ng schedule ng pagbabakuna.

Ang mga nabibigyan ng schedule ng bakuna ay alinsunod sa first in, first out system at mahigpit na ipinagbabawal ang walk in sa mga vaccination sites.