2 Chinese timbog sa P1.054 bilyong shabu
MANILA, Philippines — Naaresto ng mga tauhan ng Philippine Drug Enforcement Agency (PDEA) ang dalawang Chinese national sa magkahiwalay na anti-drug operation sa Cavite at Parañaque City kamakalawa ng hapon.
Ang mga suspek ay kinilalang sina Man Kuok Wong, 39, alyas Jose Baluyot Wong; at si Zhizun Chen, 38, nakatira sa Villa Nicacia Subdivision, Brgy.Tanza Luma, Imus City, Cavite.
Nakumpiska kay Wong ang tinatayang 117 kilo ng hinihinalang shabu na nagkakahalaga ng P795.6 milyon na nakatago sa mga tea bags.
Nakuha rin mula sa suspek ang marked money, cellular phone, isang Toyota Corolla na may plate number na TPF-197; Mazda CX-5 na may plakang NCU-5075 at Nissan GTR na may conduction sticker na F2P-235.
Naaresto, alas-3:00 ng hapon sa isang parking lot ng isang supermarket sa Brgy. Baclaran, Parañaque City ang suspek na si Chen at nasamsam ang nasa 38 kilo ng hinihinalang shabu na nagkakahalaga ng P251 milyon na nakatago rin sa mga tea bags, isang mobile phone, isang maroon Mitsubishi Lancer na may plate number na WFG-362, at isang silver Chrysler na may plate number na WIV-952.
Ang mga suspek ay kapwa nakapiit at nakatakdang kasuhan ng paglabag sa Republic Act 9165 o The Comprehensive Dangerous Drugs Act of 2002. - Ludy Bermudo, Doris Franche, Cristina Timbang
- Latest
