PE kay Duterte: Huwag aawayin ang China!
MANILA, Philippines — “Huwag aawayin ang China at sa halip ay ituloy ang pakikipagkaibigan nang hindi isinusuko ang karapatan sa West Philippine Sea.”
Ito ang naging payo ni dating Senate President Juan Ponce Enrile kay Pangulong Rodrigo Duterte na naging special guest sa meeting kamakalawa ng gabi sa Malacañang kung saan ibinahagi niya ang mga nalalaman sa isyu ng WPS.
“We are in this region. Realistically, we cannot ignore China. We have to deal with China. Instead of making China a foe or irritate China, why don’t we befriend China without surrendering our rights? We befriend China because we are Orientals, we understand each other,” ani Enrile.
Ayon pa kay Enrile na mas malaki ang mawawala sa Pilipinas kung aasarin ang China.
“Dapat friendly ang approach natin dyan. Hindi hard, assertive, and aggressive approach. Kung hindi tayo magkakaunawaan sa Tsina, madadamay ang interes ng ating mga kababayan, ekonomiya, at ating seguridad,” ani Enrile.
Nilinaw ni Enrile na hindi siya pro-China at wala siyang interes sa China at ang interes niya ay para maprotektahan ang bansa.
Ipinunto rin ni Enrile ang mga ulat na mayaman sa langis ang South China Sea na tinatawag ding WPS at tiyak na hindi basta-basta isusuko ng China ang kanilang karapatan sa lugar.
Idinagdag din ni Enrile na mahalaga sa China ang WPS dahil 80 porsiyento ng kanilang enerhiya at pagkain ay dumadaan dito.
Sinang-ayunan din ni Enrile ang posisyon ng China na makipag-usap sa nasabing bansa tungkol sa mga pinag-aagawang teritoryo sa halip na pairalin ang emosyon.
- Latest
