DILG sa LGUs: Maghanda na sa ramped-up vaccination program
MANILA, Philippines — Dahil sa patuloy na pagdating ng milyun-milyong bakuna laban sa COVID-19, pinaghahanda na ng Department of the Interior and Local Government (DILG) ang mga local government units (LGUs) para sa kanilang vaccination efforts upang maabot ang hanggang 4-million jabs sa pagtatapos ng susunod na buwan.
Ayon kay Interior Secretary Eduardo Año, ang target sa National Capital Region (NCR) ay makapagsagawa ng 120,000 jabs kada araw simula sa susunod na buwan, sa tulong ng pribadong sektor, na nagsimula na ng simulation exercises kasama ang private supply chain experts.
Nabatid na hanggang nitong Mayo 11, ang bansa ay nakatanggap na ng 7,764,050 total vaccine doses mula sa iba’t ibang suppliers kabilang ang COVAX facility, at 83% nito ay naipamahagi na sa may 3,688 vaccination sites sa buong bansa.
Anang kalihim, bilang pagsunod sa “center of gravity principle”, mas maraming bakuna silang ilalaan sa Metro Manila, Bulacan, Rizal, Laguna, Cavite, Batangas, Pampanga, Cebu, Davao, at iba pang lugar na may mataas na aktibong kaso ng COVID-19, upang mapigilan ang pagkalat ng sakit.
- Latest
