Skyway Stage 3, libre pa rin sa mga motorista
MANILA, Philippines — Hangga’t kaya pa umanong balikatin ng San Miguel Corp. (SMC), na siyang nagtayo at nagpondo sa proyekto ay libre pa ring magagamit ng mga motorista ang Skyway Stage 3.
Ayon kay SMC Pres. Ramon Ang, hindi sila nagmamadaling makakolekta lalo na at may pandemya pa sa ngayon.
Paglilinaw pa niya, ang prayoridad nila ay ang matapos ang proyekto at makapagbigay ng maayos na serbisyo sa mga mamamayan.
“Hindi naman kami nagmamadali. Hangga’t kaya namin, kargahin po namin ‘yun,” ayon kay Ang.
Matatandaang pormal na binuksan ng SMC ang naturang 18-km elevated Skyway Stage 3 sa publiko noong Enero 14 pa ngunit hanggang sa ngayon ay hindi pa sila nangungolekta ng toll fee. Ang Skyway Stage 3 project, na 97.68% nang kumpleto, ang siyang nagkokonekta sa North Luzon Expressway (NLEX) at South Luzon Expressway (SLEX).
- Latest
