Sanggol na isinoli ng umampon, pinalo ng nanay, patay
MANILA, Philippines — Hindi na umabot ng buhay sa ospital ang 1-anyos na sanggol na lalaki matapos ito ay hatawin ng rattan stick ng kanyang ina na nairita sa kaiiyak nito naganap sa loob ng bahay sa Taguig City, kamakalawa ng hapon.
Sasampahan ng reklamong Parricide sa Taguig Prosecutor’s Office ang suspek na kinilalang si Christine May Dabuit y De Vera, 18-anyos, residente ng Block 129, Lot 16, Eitio Imelda, Barangay Upper Bicutan, Taguig City, na nakapiit sa Taguig Police Station.
Sa ulat, naganap ang insidente, alas-12:30 ng hapon ng Abril 20, sa bahay ng mag-ina na kung saan ay magkatabing na-tutulog ang mga ito nang magpalahaw ng iyak ang sanggol.
Nairita ang ina sa hindi pagtahan ng anak kaya’t kumuha ito ng rattan stick at pinagpapalo hanggang sa nakitang nahihirapang huminga at isinugod sa Barangay Health Center sa Upper Bicutan.
Pinayuhan ang suspek na itakbo na sa Taguig-Pateros District Hospital, subalit idineklarang dead on arrival ang sanggol dahil sa mga pasa at hematoma.
Sa salaysay ng isang Monique Mata, 30-anyos, make-up artist, na inampon niya ang biktima noong 2 buwang gulang pa lang, subalit nang mawalan ng trabaho dahil sa pandemya ay isinoli niya ito sa suspek.
- Latest