Pagbusisi ng PNP sa community pantries ‘di iniutos — DILG
MANILA, Philippines — Itinanggi kahapon ni Interior Secretary Eduardo Año na inutusan niya ang Philippine National Police (PNP) na busisiin ang community pantries sa buong bansa.
Ang paglilinaw ay ginawa ni Año matapos na ibulgar ni Ana Patricia Non, ang organizer ng orihinal na community pantry sa Quezon City na tinatawag na ‘Maginhawa community pantry,’ ang ginawang pagkuwestiyon sa kanya ng tatlong pulis na nais umanong kunin ang kanyang contact number at inaalam maging ang organisasyon ng kanyang kinabibilangan.
Dahil sa pangyayari ay nagsuspinde na rin muna ng operasyon ang Maginhawa community pantry at humingi na rin si Non ng tulong mula kay Quezon City Mayor Joy Belmonte.
“Natatakot po ako maglakad mag-isa papunta sa community pantry ng alas-5:00 ng umaga dahil po sa walang basehang paratang sa amin. Gusto ko lang po talaga makatulong at sana po ay huwag niyo masamain,” ayon pa kay Non sa isang Facebook post.
“Sigurado po maraming tao po ang pipila sa amin pero kailangan po muna nila maghintay sa susunod na araw bago po ito maipamahagi. Lalo na po at nagkaproblema kanina ang ibang Community Pantry sa mga kapulisan,” aniya pa.
- Latest
