EUA ng Janssen at Covaxin, aprub na — FDA

MANILA, Philippines — Upang magamit din sa bansa ay inaprubahan na nang Food and Drug Administration (FDA) ang aplikasyon para sa “emergency use application (EUA)” ng Covaxin at Janssen COVID-19 vaccines.

Ang Covaxin ay gawa ng Bharat Biotech ng India habang ang Janssen naman ay gawa ng Johnson and Johnson.

Ang Covaxin ay may 92% hanggang 95% na efficacy sa lahat ng lahi sa mundo.

Sinabi ni Indian Ambassador Shambhu Kumaran na handa ang India na magsuplay ng inisyal na batch na walong milyong doses ng bakuna para sa Pilipinas.

Pinasalamatan din ni Kumaran ang gobyerno ng Pilipinas sa pag-apruba sa EUA ng Covaxin sa isang Twitter post.

Partikular niyang tinukoy ang Department of Health at si Department of Foreign Affairs Secretary Teodoro Locsin Jr.

Ang Janssen naman na gawa ng US-based Johnson and Johnson ay isang single dose na bakuna na nag-aplay ng EUA noong Marso 31.

Sa kasalukuyan, tanging Sinovac at AstraZeneca pa lamang ang mga bakunang ginagamit sa “vaccination program” ng pamahalaan na nag-umpisa nitong Marso.