‘Time out’ ng health workers ‘di pa kailangan
Sa pagsirit ng COVID-19 case…
MANILA, Philippines — Dahil sa makakaya pa naman umano ang sitwasyon sa kabila ng muling pagtaas ng bilang ng dinadapuan ng COVID-19 ay hindi pa napapanahon para humingi muli ng “time-out” ang mga health workers sa bansa.
Ito ang iginiit ni Department of Health Undersecretary at spokesperson Maria Rosario Vergeire dahil nasa “manageable level” pa rin ang sitwasyon sa mga ospital kahit na tumaas ang admisyon ng mga pasyente.
“When we went around nakita natin dumadami po talaga ang mga tao sa ER (emergency room), ang may mga sintomas ng COVID. Pero to say that the system is overwhelmed? No,” paliwanag ni Vergeire.
Sa kanilang pag-iikot, marami sa mga ospital ay nasa 50 porsyento pa ang available na COVID-beds para sa mga bagong pasyente.
Kung darating naman umano ang punto na kakailanganin muli na magpahinga ang mga healthcare workers para hindi naman sila ang magkasakit o bumigay ay irerekomenda naman ito ng DOH sa pamahalaan, paglilinaw ni Vergeire.
Sa kasalukuyan, wala pa umanong ebidensya na ang mga new variants ang dahilan ng pagsirit sa mga bagong kaso ng COVID-19. At tanging nakikita ngayon ay ang pagpapabaya ng publiko sa ‘safety protocols’ kaya tumaas ang bilang ng mga kaso.
Kasalukuyan pa rin ang epidemiological investigation sa koordinasyon sa World Health Organization (WHO) ukol sa mga bagong variants.
- Latest
