12-wheeler truck, nagliyab sa EDSA
MANILA, Philippines — Nagliyab ang isang 12-wheeler truck habang bumibiyahe sa southbound lane ng EDSA sa Cubao, Quezon City, kahapon ng madaling araw.
Nabatid na ligtas naman ang driver ng truck na si Rolly Cabuyag, gayundin ang kanyang kasamang pahinante, na hindi kaagad nakuha ang pangalan.
Batay sa ulat ng Bureau of Fire Protection (BFP) – Quezon City, pasado alas-12:39 ng madaling araw nang respondehan nila ang sunog sa southbound ng EDSA, malapit sa Main Avenue Station ng EDSA busway.
Ayon kay Cabuyag, galing sila ng Montalban at magdadala sana ng graba sa Pasig City nang pagsapit sa naturang lugar ay bigla na lang umusok at umapoy ang makina.
Aniya, sinubukan pa nilang patayin ang apoy gamit ang fire extinguisher ngunit lumaki na ito at dito na sila napilitang bumaba ng truck kasama ang pahinante upang hindi madisgrasya.
“Nag-wild ’yung makina. ’Di na namin napigilan. ’Yung tambutso umapoy. ’Di na nakayanan ng fire extinguisher hanggang sa umapoy ng buo ang ulo [ng truck],” ayon sa driver.
Kaagad rin namang dumating ang mga bumbero at inapula ang nasusunog na trak.
- Latest