Pfizer vaccines inaasahan sa Abril
MANILA, Philippines — Sinabi kahapon ni Vaccine czar Secretary Carlito Galvez Jr., na inaasahan na darating sa bansa ang inisyal na suplay ng bakuna buhat sa Pfizer-BioNTech na nasa ilalim ng COVAX Facility sa buwan ng Abril.
“Ang tingin po namin baka April na po ‘yung Pfizer kasi alam po natin na napakalaki ng demand ng Pfizer,” ayon kay Galvez.
Inaasahang nasa 117,000 doses ng Pfizer ang darating na inisyal na suplay sa pamamagitan ng COVAX Facility ng WHO at GAVI alliance na tumitiyak na lahat ng bansa ay mabibigyan ng bakuna.
Tiniyak naman umano kay Pangulong Rodrigo Duterte ng World Health Organization (WHO) na mabibigyan naman ang Pilipinas ng suplay sa kabila ng kakapusan at agawan sa bakuna ng mga bansa sa mundo. Inisyal na naka-iskedyul ang delivery nito noong Pebrero ngunit naantala.
Sa liham ng WHO sa Pangulo, makararating ang mga bakuna basta pipirma ang Pilipinas sa ‘indemnification agreement’.
Nais umano ng mga manufacturer na walang sasagutin, sakaling magkaroon ng seryosong side effects ang isang matuturukan ng kanilang bakuna at sasagutin ng host na bansa.
- Latest