Lady solon walang VIP treatment sa pagpapaturok ng Sinovac
MANILA, Philippines — Nilinaw kahapon ni House Committee on Health Chairperson at 4th District Rep. Angelina “Helen” Tan na walang nangyaring VIP treatment sa kanyang pagpapaturok ng Sinovac.
“Hindi po ito totoo (VIP). Una, hindi ako tinurukan ng bakuna dahil ako ay Kongresista o tagapanguna ng Committee on Health ng Mababang Kapulungan ng Kongreso kahit pa ako ay isang doktor,” paglilinaw ni Tan.
Si Tan ang kauna-unahang Kongresista na nabakunahan ng Sinovac COVID -19 vaccine noong Marso 2 o isang araw matapos dumating sa bansa ang 600,000 doses ng nasabing bakuna na donasyon ng China sa pamahalaan.
Ang pagbabakuna ay isinagawa sa Veterans Memorial Medical Center (VMMC) kung saan nagsisilbi bilang surgeon ang panganay na anak na lalaki ni Tan.
“Ako ay nagpaturok dahil sa alokasyon ng bakuna na nakalaan para sa aking panganay na anak na nagtatrabaho bilang doktor sa VMMC.
Bahagi ng programa sa pagbabakuna ng VMMC na bigyan ng bakuna ang tatlo (3) na kapamilya ng mga empleyado nito na nais magpabakuna,” paliwanag ni Tan.
Ayon naman kay VMMC Director Dr. Dominador Chiong Jr., isinumite at aprubado ng National Vaccination Committee ang mga binakunahan sa kanilang hospital.
- Latest