4 months old baby sa Pasay positibo sa COVID-19
55 barangay naka-lockdown…
MANILA, Philippines — Isang apat na buwang gulang na sanggol na natuklasan ng Pasay City Health Office na positibo sa COVID-19.
Sinabi ng nurse na si Mark Anthony Ejercito Castillo, nakatalaga sa City Disaster Risk Reduction and Management Office, na siyang unang rumesponde nang malaman nila na positibo sa Covid-19 ang bata, na inilipat na nila sa MOA Quarantine Facility kasama ang kanyang 23-anyos na ina.
Hinala nila na nakuha ng bata ang virus sa kaniyang ina dahil madalas silang magkasama at dahil na rin sa pagpapadede.
Samantala, nagpapasaklolo na sa Department of Health (DOH) ang lokal na pamahalaan makaraang umakyat na sa 55 ang bilang ng barangay na naka-lockdown at pinangangambahan din na posibleng UK variant ng COVID-19 ang kumakalat.
Kaya hiniling ni Mico Llorca, officer-in-charge ng Pasay City Epidemiology and Surveillance Unit na isailalim sa “genome sequencing” ang mga samples sa siyudad para makumpirma kung anong variant ng COVID-19 ang tumama sa kanila dahil sa hindi pangkaraniwang hawahan.
Umakyat na sa 395 ang active cases sa lungsod kung saan 66 sa mga kaso ay magkakasama sa bahay. Kabilang na dito ang isang ina at kaniyang sanggol na pinakabagong mga kaso sa lungsod.
- Latest