21 menor na sinasanay bilang child warrior nasagip
MANILA, Philippines — Nasagip kahapon ng umaga ng pinagsanib na puwersa ng Philippine National Police (PNP), Armed Forces of the Philippines (AFP) at Department of Social Welfare and Development (DSWD) ang nasa 21 menor de edad na sumasailalim sa “revolutionary training” sa University of San Carlos Retreat House Talamban Campus sa Talamban, Cebu City.
Ito ang inihayag ni PNP Chief Gen. Debold Sinas na isang indikasyon umano ito na tuloy-tuloy ang pagsasanay ng CPP-NPA ng mga child warriors na malinaw na paglabag sa International Humanitarian Law.
Ayon kay Sinas, ang mga kabataan ay nanggaling sa NPA-front Salugpungan School sa Talaingod, Davao del Norte na isinara ng DepEd noong 2019 at dinala sa Cebu ng walang paalam sa mga magulang ng mga ito.
Inilunsad ang rescue operation matapos na humingi ng tulong ang mga magulang ng mga bata sa mga otoridad para mahanap ang kanilang mga anak na dalawang taon nang nawawala.
Inamin ng ilan sa mga kabataan na sila ay sinasanay sa pagiging military ng kanilang mga “handlers.”
Naaresto naman sa operasyon ang anim na indibidwal na nagtuturo sa mga bata.
Nahaharap ang mga ito sa kasong illegal detention, human trafficking, at paglabag sa RA 9851 (IHL Act) at RA 11188 (Special Protection of Children in Situations of Armed Conflict).
- Latest