Binangonan police chief, 6 pa sabit sa kotong

MANILA, Philippines — Pinaiimbestigahan ng Philippine National Police (PNP) ang pangingikil sa Binangonan Municipal Police Station matapos mahuli ang dalawang asset na sibilyan.

“I will not let this incident pass without implementing appropriate criminal and administrative action against those involved,” giit ni PNP chief Police General Debold Sinas.

Kaya’t iniutos na ni Sinas kay Calabarzon police director Police Brigadier General Felipe Natividad na imbestigahan si Binangonan police chief Police Lieutenant Colonel Ferdinand Ancheta na responsable sa umano’y pangingikil ng mga tauhan nito.

Nitong Martes ay naaresto ng PNP Integrity Monitoring and Enforcement Group (IMEG) sina Albert Domingo alias Joel, at Pablo Dolfo alias Botchok, parehas na civilian asset ng Binangonan Police Station. Nakumpiska ang pera, cellphone, sasakyan, at motorsiklo kay Domingo.

Sinabi ng PNP-IMEG, sangkot din sina P/Senior Master Sergeant Randy Andanar;P/Senior Staff Sergeant Joel Acosta;P/Senior Staff Sergeant Joe Sevillena;P/Corporal Allan Alvarez; P/ Corporal Marson Tayaban; at P/Corporal Lew Armesis na pawang nakostudiya na para sa karagdagang imbestigasyon.

Ang pagkakaaresto sa mga suspek ay dahil sa natanggap na reklamo mula sa biktimang si Stephen Kellu na na-impound ang  motorsiklo at ibibigay lang ang motorsiklo kapag nakapagbigay na ito ng pera na hiningi nina Domingo at Dolfo upang mailabas ang  na-impound na motorsiklo.

Nadiskubre rin ng PNP IMEG na nakakalabas ng piitan si Police Corporal Archieval Perez, na nahaharap sa kasong Infidelity in the Custody of Prisoners, na non bailable offense.