Volunteers sa clinical trials, ‘wag matakot — DOST
Masamang epekto, sagot ng WHO
MANILA, Philippines — Binighyang-diin ng isang opisyal ng Department of Science and Technology (DOST) na hindi dapat matakot ang mga taong magboboluntaryo o lalahok sa isasagawang solidarity trial sa COVID-19 vaccines sa bansa.
Sa isang panayam, sinabi ni DOST-Philippine Council for Health Research and Development Executive director Jaime Montoya na bukod sa dumaan ito sa Phase 1 at Phase 2 clinical trials sa ibang bansa ay sagot ng World Health Organization (WHO) ang anumang mararanasang masamang epekto kung sakali.
Ayon kay Montoya, ang gagamitin ng WHO sa solidarity trial ay ang COVID-19 vaccines na dumaan na sa Phase 1 at Phase 2.
“Kung may mangyari, minor or major, ito ay sasagutin ng WHO. Tutulungan ng WHO. Merong inalaang pondo para magamit sa mga volunteer,” pahayag ni Montoya.
Kailangan din aniyang, maipaliwanag sa mga magbo-volunteer sa nasabing trial ang detalye ng bakuna.
Target sa nasabing trials ang 15,000 volunteers na nasa edad na 18-59 na isasagawa sa Metro Manila sa huling mga araw ng Enero o mga unang linggo ng Pebrero. Gayunman, hindi pa tinutukoy ang brand ng gagamiting COVID-19 vaccines.
- Latest
