2 lalaki sinalvage sa Makati
MANILA, Philippines — Dalawang bangkay ng lalaki na pinaniniwalaang biktima ng salvage ang natagpuan kahapon ng madaling araw sa kahabaan ng Osmeña Highway, Brgy. San Antonio, Makati City.
Kapwa nakagapos patalikod ang dalawang bangkay ng lalaki na may mga tama ng bala sa ulo at katawan na may ilang metro lang ang layo sa isa’t isa.
Unang nadiskubre, ala-1:15 ng madaling araw sa Osmeña Hiway (north bound) ng nasabing barangay ang biktima na nakasuot ng itim na t-shirt, kulay beige na cargo pants, itim na rubber shoes, may edad 40-45, medium built, maputi, may taas na 5’6-5’8 at may mga tama ng bala sa ulo at nakagapos patalikod ang mga kamay ng itim na kable.
Makalipas ang isang oras, o alas-2:20 ng madaling araw ay isa pang duguang bangkay din ng lalaki ang nadiskubre sa Osmeña Hi-way (North Bound), na sakop naman ng Brgy. Pio Del Pilar, Makati City.
Inilarawan ang ikalawang biktima sa suot na blue t-shirt na may collar, kulay beige din ang short pants, blue ang suot na tsinelas, maitim, nasa 25-30 ang edad, medium built, may taas na 5’4-5’6.
Nakakuha ng 7 basyo ng bala ng 9mm kalibre sa pinagyarihan.
- Latest