Naka-quarantine sa mga tents, inilikas
MANILA, Philippines — Inihayag kahapon ng Department of Health (DOH) na nagsagawa na sila ng paglilikas sa mga taong nasa mga quarantine tents patungo sa mas ligtas na lugar upang matiyak ang kanilang kaligtasan dahil sa inaasahang paghagupit ng pinangangambahang supertyphoon “Rolly”.
Ayon kay Health Spokesman Usec. Maria Rosario Vergeire, bukod sa paglilikas ng mga naka-quarantine dahil sa COVID-19, naglunsad na rin sila ng massive information sa mga pasilidad at komunidad.
“Actually ngayon po we are having this massive information drive para po sa ating mga facilities, para po sa ating mga communities. Unang-una sa ating mga facilities, nagkaroon na po ng mga pagta-transfer ng ating mga naka-quarantine sa mga iba’t ibang lugar na nasa tent lang at itina-transfer natin sa mas secured na place,” ani Vergeire sa Laging Handa public briefing.
Tinanggal na rin aniya ang mga kagamitan sa mga pasilidad na medyo hindi secure at inilipat sa mga ospital.
Idinagdag ni Vergerie na inatasan na rin ang mga local government units na maghanda ng mga evacuation sites kung saan masusunod ang mga ipinatutupad na protocols tungkol sa minimum public health standards upang matiyak na hindi tataas ang bilang ng mga COVID-19 patients.
- Latest