507 regular jeepney at 19 modern jeepneys, aarangkada na
MANILA, Philippines — Simula ngayong araw ay papasada na ang 507 unit ng regular traditional jeepney at 19 na modern jeepneys sa limang bagong ruta na binuksan ng ahensiya sa Quezon City, Marikina, Maynila at Pasay City.
Sa ipinalabas na memorandum circular ng LTFRB, maaari nang pumasada ang mga roadworthy na jeepneys na mayroong prangkisa sa mga ruta sa Parang-Recto o mula Marikina hanggang Recto sa Maynila, Parang-Stop and Shop via Aurora Blvd, Recto-SSS Village via Aurora Blvd. at España Blvd. at Libertad-Pinagbarilan sa Pasay City.
Sa may SM Fairview naman hanggang Buendia Avenue papasada ang mga modern Jeepneys na bukod sa air-conditioned at Euro - compliant ang makina ay mayroon ding nakakabit na CCTV, Dashcams, WIFI, Speed limiters at Automatic fare Collection System.
Muling ipinaalala ng LTFRB ang istriktong pagpapatupad ng 7 commandments sa public transport tulad ng pagsusuot ng face mask, face shield, pagrerekord ng impormasyon ng mga pasahero na bahagi ng Health protocol sa loob ng mga pampasaherong sasakyan.
Nilinaw din ng LTFRB na walang pagtataas ng singil sa pasahe sa mga modern jeepneys at wala ding taas pasahe sa mga ruta ng traditional jeepneys.
- Latest
