7 pusher tiklo sa P1.3 milyong shabu

MANILA, Philippines — Pitong drug pusher ang naaresto ng mga otoridad sa magkahiwalay na buy-bust operation sa Paranaque City at Taguig City kamakalawa.

Bandang, alas-8:20 ng Miyerkules ng gabi nang magkasa ang mga otoridad ng buy-bust sa tapat ng isang bahay sa No. 10 Ninoy Aquino Avenue sa Brgy. San Dionisio, Parañaque City at dito ay naaresto ang mga suspek na sina Dima Sayaat, alyas Penda, 28; Sabrin Polindao, 32; at si Richard Buenvenida, 39 at nakumpiska ang 11 malalaking plastic sachet na naglalaman ng tinatayang 170 gramo ng hinihinalang shabu na may halagang P1,156,000.

Una rito ay alas-7:43 ng gabi nang masakote sa sa may No. 442 PNR Site, FTI Compound, Brgy. Western Bicutan,Taguig City ang mga drug suspek na sina Armando Bagain, 37; Kevin Lunzaga, 28; Vincent Zabala, 28 at Gilbert Esquivil, 37 na kung saan nasamsam ang 6 medium size plastic sachet na naglalaman ng tinatayang 27 gramo ng shabu na may halagang P183,000 ang nakumpiska sa kanila maging ang isang P500 marked money na ginamit sa operasyon.