3 drug suspects timbog sa P20.4 milyong shabu
MANILA, Philippines — Tatlong drug suspects kabilang ang isang menor de edad ang nadakip sa isang buy-bust operation ng mga tauhan ng Philippine Drug Enforcement Agency (PDEA) at nasamsam ang nasa P20,400,000 halaga ng shabu sa Taguig City kamakalawa ng gabi.
Ang mga naarestong suspek ay kinilalang sina Jaynard dela Rosa Pamittan; John Jever Gujilde; at isang alyas Nel, isang menor de edad.
Sa ulat ng PDEA, bago naaresto ang mga suspek, alas-6:30 ng gabi sa open parking lot ng Market Market ng lungsod ay nakatanggap ng tip ang mga otoridad hinggil sa illegal na aktibidad ng mga suspek.
Nang makumpirma ang ulat, nakipagtransaksiyon ang mga otoridad sa mga suspek at nagkasa ng isang buy-bust operation at inaresto ang mga suspek matapos na bentahan ng shabu ang isang poseur buyer.
Nakumpiska mula sa mga suspek ang humigit-kumulang sa tatlong kilo ng shabu na nagkakahalaga ng P20,400,000, dalawang mobile phones at isang itim na Honda City (ALA-5893), na ginamit sa transaksiyon, at genuine na P1,000 at boodle money.
- Latest