MANILA, Philippines — Isinusulong ni Muntinlupa City Rep. Ruffy Biazon ang 10 MBPS minimum speed para sa mga broadband internet sa bansa upang hindi magkaroon ng aberya sa online classes.
Inihain niya ang House Bill (HB) 28 o ang Faster Internet Services Act na nag-oobliga sa mga Internet Service Providers (ISPs) na magkaloob ng minimum na koneksyon sa bilis ng internet na nasa 10 megabytes per second (MBPS).
Ang panukalang batas ay isinulong matapos na makarating sa kaalaman nito ang isang magkapatid na lalaki sa Bohol na namatay matapos na makuryente habang nagkakabit ng internet signal booster para sa kanilang online classes.
Binigyang diin pa ni Biazon na ang Pilipinas ay napag-iwanan na sa bilis ng serbisyo ng internet ng iba pang mga bansa sa Asya. Tinukoy ni Biazon na ang Singapore ay may average download speed na 133.1 MBPs kumpara sa napakahinang 3.7 MBPs sa Pilipinas na pinakamababa sa buong Association of Southeast Asian Nationals (ASEAN).