2nd round ng rigodon sa Kamara
MANILA, Philippines — Magkakaroon muli ng panibagong balasahan sa committee chairmanship sa Mababang Kapulungan ng Kongreso.
Ito ang sinabi ni Speaker Lord Allan Velasco at pinag-aaralan pa niya ang mga committee chairmanship habang nakabakasyon ang Kamara para malaman kung sinong mga kongresista ang dapat mapalitan sa puwesto.
Inihayag ni Velasco sa panahon ng nakabakasyon ang Kamara kung saan sa Nobyembre 16 pa muli magbubukas ang sesyon ay isasailalim niya sa masusing ebalwasyon ang performance ng mga chairman ng mga committee upang mabatid kung sino sa mga ito ang dapat palitan sa puwesto.
Si Velasco ay naupong lider ng Kamara matapos namang iboto ng 186 kongresista na tuluyang nagpatalsik sa puwesto kay Taguig-Pateros Rep. Alan Peter Cayetano matapos itong hindi tumalima sa 15-21 term sharing agreement.
Alinsunod sa deal, ang Speaker at ang Chairman ng Committee on Accounts lamang ang dapat palitan, pero sinabi ni Velasco sa mga nangyari ay nasira na ang term-sharing agreement.
Ayon kay Velasco, may mga posisyon na dapat palitan ang chairmanship dahilan sa kailangan ay may tiwala ang Speaker sa hahawak ng nasabing mahahalagang puwesto na krusyal sa liderato ng Kamara.
Sinabi pa ni Velasco na si Leyte Rep. at House Majority Leader Martin Romualdez na naging kandidato rin bilang Speaker noong 2019 ang hindi niya papalitan sa puwesto.
Hindi naman aniya bahagi ng deal na manatili sa puwesto bilang Deputy Speaker ang kaniyang kritiko na si 2nd District Camarines Sur. Rep. Luis Raymund Villafuerte.
- Latest
