Grade 7 nahulog mula sa ika-4 na palapag ng gusali

MANILA, Philippines — Isang 12-anyos na lalaki ang nilalapatan ng lunas sa ospital matapos masugatan nang mahulog mula sa ikaapat na palapag sa Building 4, Centennial Village, Barangay Western Bicutan, Taguig City, kamakalawa ng gabi.

Sa ulat ng Southern Police District, alas-6:30 ng gabi ay saglit lumabas ang 40-anyos na nanay para pumunta sa kapitbahay upang manghiram ng cellphone na gagamitin sa pagsagot ng module ng mga anak.

Pagkalipas ng 10 minuto, bumaba naman ang kuya para bilhan ng pagkain ang biktima na isang  Grade 7 student.

Pagbalik ng kuya ay nadatnan niya ang isa nilang kapitbahay na buhat-buhat ang kapatid at sinabing nahulog  mula sa 4th floor.

Agad itinakbo ang bata sa Ospital ng Makati kung saan siya inoobserbahan.

Lumabas sa imbestigasyon na umakyat ang bata sa bintana na walang grill upang kunin ang nakasampay na comforter nang ito ay mawalan ng balanse at nahulog.