Tatapusin ang rehabilitasyon ng Manila Bay — Malacañang
MANILA, Philippines — Tuloy ang rehabilitasyon sa Manila Bay kahit pa nabatikos ang nagastos sa paglalagay ng dolomite sands upang magmukhang puting buhangin.
Ito ang tiniyak kahapon ni Presidential Spokesperson Harry Roque, at kailangang tapusin ang nasimulang proyekto at hindi maaaring gamitin ang pondo sa COVID-19 response.
“Nasimulan na po iyan eh, so kinakailangan tapusin na po iyan. Ang mga nari-realigned ay iyong mga hindi nagsisimulang mga proyekto,” ani Roque.
Ginawa ni Roque ang pahayag matapos matanong tungkol sa sinabi ng mga eksperto mula sa University of the Philippines Marine Science Institute na mahal ang Manila Rehabilitation Project na hindi naman tutugon sa problema ng Manila Bay.
May mga nagsasabi na dapat ginamit na lamang sa COVID-19 response ang pondo kaysa sa ipinambili ng dolomite sands.
“Iyong budget po kasi diyan, hindi lang siya budget actually for the rich nourishment, it’s actually for the entire program of government in rehabilitating Manila Bay. And as I said, itong project na ito was proposed two years ago, included in last year’s budget and only being implemented,” paliwanag ni Roque.
Pansamantalang isinara sa publiko ang bahagi ng Manila Bay na nilagyan ng dolomite sands matapos dagsain ng mga mamamayan na karamihan ay hindi sumunod sa social distancing.
- Latest
