Transaction fees sa online bank payment pinasususpinde
MANILA, Philippines — Umapela si Senador Sonny Angara sa lahat ng bangko at mobile payment system na isuspinde ang pangongolekta ng bayaran sa digital transaction dahil patuloy pang nakikipagbuno ang bansa sa coronavirus disease 2019 (COVID-19) pandemic.
Sinabi ni Angara na magsisimula nang mangolekta ng transaction fees ang mga bangko at mobile money services kahapon sa kabila ng apela ng Bangko Sentral ng Pilipinas (BSP) na palawigin ang paniningil ng PESONet at InstaPay transactions.
Paliwanag ni Angara, ginagawa ng gobyerno ang lahat para tulungan ang publiko sa gitna ng pandemya kaya inaasahan na tutulong din ang mga bangko at mga financial institutions.
Maging si Senador Imee Marcos ay nanawagan na suspendihin ang mga transaction fees hanggang sa kalagitnaan ng taong 2021 o kaya ay hanggang magkaroon ng bakuna sa COVID-19.
Partikular na pinasususpinde ang minimum na P15 na service charge sa money transfer gayundin ang P20 na over the counter at cash withdrawal gamit ang master card at ang sinisingil na 1% hanggang 2% na cash in at over the counter transactions fee para sa P80 pataas na transaksyon sa mga financial technology company.
Nabatid noong 2019 na wala pang pandemya kumita sila sa e-transactions ng P750 bilyon.
- Latest