Saliva testing isinasailalim na sa pag-aaral
MANILA, Philippines — Isinasailalaim na sa pag-aaral sa laboratoryo ang paggamit ng laway bilang medium sa COVID-19 testing tulad ng ginawa ng Japan.
Ito ang Sinabi ni Health Undersecretary Maria Rosario Vergeire na may nagpresenta sa kanila na mga health experts sa paggamit ng laway.
Una ay ginagamit itong specimen na hahalili sa kinukuhang sampol sa lalamunan o ilong para sa RT-PCR test at ikalawa ay direktang pagsasailalim nito sa testing.
May sarili na ring pag-aaral ang Philippine Red Cross (PRC) ukol dito habang matagal na ring isinasailalim sa ‘laboratory analysis’ ang saliva testing sa Research Institute for Tropical Medicine (RITM).
Ang pag-aaral kung magagamit ang laway sa RT-PCR test ay upang mas madali ang proseso ng pagsasailalim sa test ng mga pasyente kaysa sa pagkuha ng sampol sa ilong o lalamunan.
Samantala, kinumpirma rin ni Vergeire na bumagsak sa pamantayan ang SD Biosensor antigen test kits na mula sa South Korea sa ginawang ‘diagnostic performance’ ng DOH.
Mula sa pamantayan ng World Health Organization (WHO) na kailangang may 80% sensitivity at 90% specifity ang isang antigen test kit, nakapagtala lamang ang SD Biosensor ng 71% sensitivity.
Sa kabila nito, kukuha pa rin ng rekomendasyon ang DOH sa WHO na unang isinama ang SD Biosensor sa mga antigen para sa emergency use.
- Latest
