85% Pinoy nag-aalala na mahawa ng virus
MANILA, Philippines — Ayon sa pinakahuling Social Weather Stations survey ay nangangamba ang may 85% ng mga Filipino na mahawaan ng coronavirus disease 2019.
Sa SWS survey na isinagawa noong Setyembre 17-20, lumabas na sa 85% ng mga Pinoy na nag-aalala na posibleng mahawaan sila ng naturang sakit, 63% ang “matindi’ ang pag-aalala habang 22% ang bahagyang nag-aalala.
Ang naturang resulta ay kahalintulad ng naitala ng SWS may tatlong buwan na ang nakararaan.
Nabatid na siyam na porsiyento lang ang konti ang pagkabahala habang 6% ang hindi nababahala na mahawa ng COVID-19 ang sinumang miyembro ng kanilang pamilya.
Ang antas ng pagkabahala ay mataas sa Luzon sa 87%; na sinundan ng Visayas, 84%; Metro Manila, 83% at Mindanao, 80%.
Nabatid na mataas ang bilang ng mga kaso ng COVID-19 sa Metro Manila, subalit ang worry rate rito ay bahagyang bumaba sa 83% mula sa 92% noong Mayo at Hulyo.
Isinagawa ang SWS survey sa 1,249 Pinoy na edad 18 pataas gamit ang mobile phone at computer-assisted telephone interview at may sampling error margin na ±3% para sa national percentages, ±6% sa Metro Manila, ±5% sa Luzon, ±6% sa Visayas, at ±6% sa Mindanao.
- Latest