MGCQ mananatili sa Mindanao, iba pang bahagi ng bansa
Simula Agosto 16 hanggang 31, 2020
MANILA, Philippines — Inianunsyo kahapon ng Malacañang na inaprubahan ni Pangulong Rodrigo Duterte ang pananatili sa modified general community quarantine (MGCQ) ang buong Mindanao at iba pang lugar sa bansa na magiging daan upang tuluyang magbukas ang maraming negosyo.
“Ang iba’t ibang lugar po ng Pilipinas ay mapapasailalim po sa Modified General Community Quarantine or MGCQ. Iyong mga ilang probinsya po, mga highly urbanized cities at independent component cities ay kinakailangang siguraduhin ang strict enforcement ng local action,” ayon kay Presidential Spokesperson Harry Roque.
Ang buong Mindanao ay nasa ilalim ng MGCQ mula Agosto 16 hanggang 31.
Halos lahat ng lugar sa Luzon at Visayas ay nasa MGCQ din maliban sa sumusunod na nasa ilalim ng general community quarantine (GCQ): Nueva Ecija, Batangas, Quezon, Iloilo, Cebu, Lapu-Lapu, Mandaue, at Talisay at mga munisipalidad ng Minglanilla at Consolacion sa Cebu.
Inanunsiyo rin ni Roque na ang klasipikasyon para sa NCR, Cavite, Laguna at Bulacan na modified ECQ ay epektibo pa rin hanggang Agosto 18, 2020.
Abangan na lamang aniya sa Lunes kung ang magiging anunsiyo ni Pangulong Rodrigo Duterte kung babalik na sa GCQ ang Mega Manila.
- Latest