Mga empleyado obligadong mag-face shield
MANILA, Philippines — Bilang isang hakbang pa para mapigil ang pagtaas ng kaso ng COVID-19 sa bansa ay ipinanukala ni Department of Labor and Employment (DOLE) Secretary Silvestre Bello III na gawing mandatory ang pagsusuot hindi lang ng face mask kundi maging face shields sa mga empleyado sa kanilang mga workplaces tulad ng mga opisina at pabrika simula sa Sabado.
Kabilang sa panukala na kailangang sagutin ng mga employers o may-ari ng mga kumpanya ang face shields na gagamitin ng kanilang mga tauhan. Papatawan ng parusa ang mga hindi susunod sa bagong protocol.
Una nang naglabas ng kautusan ang Department of Transportation (DOTr) ng mandatory na pagsusuot ng face shield habang nasa loob ng mga pampublikong sasakyan.
Sinabi ni Department of Health (DOH) Undersecretary Maria Rosario Vergeire na hindi dapat tataas sa P50 kada piraso ang presyo ng ordinaryong face shield na nagkalat ngayon sa merkado kaya’t nakikipag-ugnayan na sila sa Department of Trade and Industry (DTI) para maglabas sila ng SRP (suggested retail price).
- Latest
