Trabaho sa ‘mobile learning hub’ alok ni Mayor Abby sa mga guro
MANILA, Philippines — Nag-aalok si Makati Mayor Abby Binay ng trabaho sa ilalim ng kanilang “Mobile Learning Hub Project” para sa mga guro na kasalukuyang walang trabaho dahil sa COVID-19 pandemic.
Ayon kay Mayor Binay, naghahanap sila ng mga guro, teacher assistants o aides, at tutors para sa nasabing bagong Makati Mobile Learning Hub Project, isang makabagong educational platform na magsusulong ng patuloy na edukasyon ng mga kabataan ng lungsod sa kabila ng pandemya.
Ayon sa alkalde, pupunta ang mobile learning hubs sa iba’t ibang lugar sa lungsod sa pagbubukas ng klase upang tulungan ang mga mag-aaral at kanilang mga magulang na makasabay sa bagong pamamaraang “blended learning”.
Aniya, ang pangunahing pakay nito ay ang mga mag-aaral na walang gadget o anumang learning tool, at mga magulang na mahihirapang gabayan at turuan ang kanilang mga anak gamit ang self-directed learning modules.
Hinimok ng alkalde ang professional educators, tutors at parateachers na mag-apply na gamit ang link na bit.ly/GuroDyipniMaki. Ang lungsod ay tatanggap ng applications hanggang August 15.
Kabilang sa qualifications ang pagiging graduate ng B.S. Education o iba pang related courses sa Mathematics, Science, Filipino, at English; kung board passer, valid PRC o Professional License for Teachers. Kailangan ding handang maitalaga sa mga barangay sa Makati.
- Latest
